Suonno - Agostino Moschettino

Vai ai contenuti

Suonno

Lavori
SUONNO

Nu juorne o pomeriggio, vers’o tardo,
quann’è ll’ora ca termin’a cuntrora,
m’ero vuttato ‘ncopp’a nu rivano,
for’a terrazza cu nu libro ‘ncore
ca parla ‘e fate, ‘e uorche, ‘e streghe e maghe.
A chella paggina addò tenev’a mana
steva na sirenetta, bella overo,
c’ognuno vurria tenè pe’ ‘nnammurata.
Ca capa china e o cappiello ‘nfaccia,
o suonno me pigliaje all’impruvviso,
e chianu chianu me trovo ‘ncopp’o mare
dint’a na barchetella cu na vela
cu attuarne sulo acqua, e acqua, e acqua.
Nun m’avvelisco pecchè, comm’o sapesse,
da dint’o mare, senza nu rumore,
n’esce na nenna bella cchiù d’o sole
cu stelle ‘e mare pe dint’e capille,
ca so ‘ndurate cchiù ‘e ogni rena,
ca sta assettata dint’a na cunchiglia
tirat’a cavallucci ‘e mare. Meraviglia:
E’ a reggina d’o mare e de’ Sirene.
Zumpanne ‘ncopp’all’onne, s’avvicina.
Me tenn’a mana, cu nu gran surriso,
me piglia a ‘ncopp’a varca cu dulcezza
e me mette cu essa int’a cunchiglia
cummigliannece e cuorpe cu na rezza.
E cammenamme. Cavalcammo ll’onne.
Giramm’e sette mare cu e cavalle
c’o funno ‘anna lassate e mo, pe nnuje,
vanne giranne e cchiù sperdute mare.
Essa abbracciat’a mme, je a essa’avvinto,
dint’a chella carrozza ‘e madreperla,
senza maje dì parola, sule cu e sguarde,
capimmo tutto chello ca vulimme,
giuranne etern’ammore cu nu vase.
Nu vase c’accumencia llà in Oriente
e nun fernisce manco all’ Occidente...
…Ecco, luntane, cumpare n’isolotto
ca cchiù che s’avvicina par’’e mele.
Simm’arrivate. Primma scenne essa
e po me proje a mana a m’ajutà.
Me trovo allora dint’a nu ciardino
addò ‘nce stanne piante e frutte rare,
cu funtane e ruscielle, ca p’e vive,
so cose ca nisciune ‘a viste maje.
O centro, po, ‘e stu bellu ciardino
‘nce sta na reggia, nunn’è nu palazzo,
addò me porta chist’ammore mio
tenenne, sempe zitta, mana dint’a mana.
Trasimme pe na porta favulosa
dint’a na stanza vasta quant’a chiazza
addò fann’o mercato e piscature,
chin’ ‘e pitture, vase e tante arazze.
Passammo dint’a na stanza addò bandita
‘nce sta na tavulata longa assaje
‘ncoppo pietanze e ogni bbene ‘e Ddio
paste, cunfiette ‘e mele, pasticciotte,
guantiere chin’’e frutte prelibbate
e po rusolie, vine, zuch’’e frutte,
cu pusate d’argiento e robba rara.
Ma manco dint’a sta stanza ‘nce fermammo.
Pigliammo a saglì ‘ncoppa p’ò scalone
ca tene e scale ‘e marme arricamato
ca pare porta ‘ncielo, tant’ess’è longa.
Ma po alla fine, senza pruvà affanno,
trasimme dint’a na stanza cu nu lietto.
Lietto?! Che dico? Chella è piazza d’armi!
Nu lietto accussì grosso maje s’è visto
e cu na morbidezza maje pruvata,
cu lunzole e coperte ‘e seta e ‘e lino,
e na montagna ca formane e cuscine.
Essa ‘nce saglie ‘ncoppo e, lentamente,
se leva a cuollo chelle tre conchiglie
ca pruteggevene accussì suavemente
e tre pizze d’o cuorpe cchiù sublime;
po se cocche girata ‘ncopp’o fianco,
cu nu surriso ’mmocca curallina,
chiammammene ca mana, assaje lasciva,
fa segne ‘e me cuccà a essa accanto.
Je nun ‘nce sto a penzà manco ‘n’istante,
me stracc’e panne a cuolle e, cu sveltezza,
me votto ‘ncuoll’a essa cu viulenza
vulennela vasà da tutte parte…
…Ma che dolore ca sentiette ‘nfronte!
Ch’è stato?! D’addò vene stu malore?…
…Sunnanneme, addurmuto, da o rivane
cadiette ‘nterra ca capocchia a sotto
truvanneme nu bubbone gruosso ‘nfronte
ca me faceva parè comm’a liocorne…
………………………………………
L’unica cosa bbona ‘e chistu suonne
era ca ll’uocchie, e trezze, o naso e o viso
eren’e stesse ‘e chella bella figliola
che a tantu tiempo cchiù nun m’’a surriso…

Creato da Francesco Moschettino
Ultima Modifica 20 Maggio 2020
Torna ai contenuti