Suonno 'ncopp'o ponte - Agostino Moschettino

Vai ai contenuti

Suonno 'ncopp'o ponte

Lavori
SUONNO ‘NCOPP’O PONTE


Passo pè ‘ncopp’o ponte cu tre arche.
Nà forza me custringe a me fermà.
M’affacc’a sotto e vec’a massa d’acqua,
ca, currenne, ‘nt’o mare và a sfucià.
Me giro areto: veco nu castiello,
ormai arredotto tutto a nu sgarrupo,
ma a spiarlo, ancora ogge se vede
tutta putenza, a furtezza ‘e ll’ussatura.
O ciummo, a chillo punto, vot’a manca,
cu na curva pussente, ca và o core…
…E m’addone ca ‘ncopp’a sponn’’e ll’acqua,
‘ncopp’a na prete, sbatten’e lenzole
na vranga ‘e piccerelle ‘ndunucchiate,
cu e schiocche rosse, lavene cantanne,
mente da dint’a scafa, o varcajuolo,
risponne cu na nenia ca se spanne
pe miez’all’aria addirosa, ‘mprufumata,
mente na migliarat’e aucelluzze
fa o coro a chesti voce appassuliate.
‘Nsicco, da ‘ncopp’e mmure d’o castiello,
s’affaccia na criatura janca e rosa
che capille arricciate, ’e culor d’oro
c’o viente ‘nce sparpaglie ‘ncopp’a faccia.
Cu na manella manne nu saluto
a na perzona, ca je, però, nun veco:
…allora songh’jo, penzo… e nu penziero
me vott’a correre ‘nzin’a chella llà.
Stongo zumpann’o mur‘e chistu ponte,
quanne na mane me port’a rialtà.
Nu signore, crerenne ca je a sotte
stesse proprio mò, mò a me vuttà,
m‘’a fermate… E quanno, po’, ‘nc’o conto,
me guarda, o pizz’a rise, e se ne và.
O corr’appriesso, o fermo e ll’addumanno:
“Signò, signò, nun me lassà accussì,
dimme, te prejo, o nomm’’e chistu ciummo,
tengo na freve, che par’’e stà int’o furno.”
O signore, se ferma. E cu na flemma, me guarda e dice:
“O nommo suojo!? Ma overo, nunn’o ssaje?
O nomme suojo, da sempe, è o Vulturno.
‘A fatt’a storia. Nun t’o scurdà maje!”

Creato da Francesco Moschettino
Ultima Modifica 20 Maggio 2020
Torna ai contenuti