'Ncopp'a loggia - Agostino Moschettino

Vai ai contenuti

'Ncopp'a loggia

Lavori
NCOPP’A LOGGIA

Stanotte sò sagliuto ‘ncopp’a loggia.
Nun putevo durmì. O suonno n’arrivava.
Me sò susuto zitto e, chianu chianu,
so’ juto ‘ncoppa, sulo, cercanne ‘e sbarià.
Che pace stev’attuorno. Nun c’era ‘nu rumore,
sul’o cchiagnere ‘e ll’onne stev’a m’accumpagnà.
Luntane tanti lluce, parev’’e acchiappà Ischia
cu ‘ncopp’a ponta o faro c’avvis’e marenare,
ca d’int’a notta vanno, ca llà ‘nce stanne rischie.
Na varca int’o mare ‘nce manna ‘na lucesa:
sò piscature triste, c’a rezza ‘anno stesa.
Prejene a Ddio c’o core de putè tirarla chjena:
sul’accussì dimane a casa nun se chiagne
sicure ca stù juorne a tavula se magne.
Avizo ll’uocchie e veco lucente cchiù ‘e llate
a stella miez’o cielo ca nuje ‘nci’amma giurato
‘e guardà ‘nzieme a stess’ora, pure si nuje luntane
stammo c’o corpo. Ma e core, ‘nchest ‘nc’amma ‘mpignate,
staranno semp’aunite e maje se spartarranno.
Ma‘o tiempo assaje è passato e chistu giuramento
n’è stato mantenuto. Sulo quacche mumento
a capa torn’o tiempe ca ‘nce amm’amato assaje
e‘e giuramente nuoste nun fernevene maje…
Mo a vita nosta scorre ognuna‘e ‘na manera:
tien’o marit’accanto e je stò ca mugliera.
Sulo quacche mumento a capa torn’arete
e spero ca guardanno sta stella, comm’ajere,
pure tu da luntano a fissa d’int’a notta.
Pensanne a chesta cosa me sent’a faccia ‘mbosa:
è ll’ummedo c’o viento porta ‘a dint’o mare.
Me passo ‘nfaccia a mana:
…è na lacrem’amara…

Creato da Francesco Moschettino
Ultima Modifica 20 Maggio 2020
Torna ai contenuti