Tiempe luntane - Agostino Moschettino

Vai ai contenuti

Tiempe luntane

Lavori
TIEMPE LUNTANE

Te passa maje pe’ capa
‘e quann’ereme  guagliune
e dint’o core nun ce steve autra speranza
‘e ‘nce vedè pe ‘nc’abbraccià, pe ‘nce vasà?
Ereme frische! Giuvane tutt’e dduje!
Accussì giuvane che, ‘nzieme, nun accucchiaveme
manco quarant’anne.
Tutto era bello. Primmavera pure a vierno…
Che belli juorne! Napule luceva sott’o sole e sott’e stelle;
o cacciuttiello curreva a piglià e prete ca nuje vuttaveme,
abbaianne e zumpanne felice, cuntento
‘e sentirse amato;
e tu t’allamentava pe na spingula d’a vesta
ca te pugneva ‘npietto.
Tutte!, tutte quante te guardavane;
sul’je te contemplavo mentre ca tu
add’a Zì Teresa, addò t’avevo purtata,
mangianne, sentive tutto chello che a ggente
‘e te diceva:
“Comm’è bella sta nenna!”;
“che profumo ca manne”;
“sotto o golfino cert’annasconn’e scelle:
è n’Angelo ch’è sciso ‘ncopp’a terra”.
Je te strignev’o braccio e te vasav’e mmane
tremmanne comme a fronna tremm’o viento…
Steveme annascuse, cu e porte chiuse, felici,
cunsumanne n’ammore pruibbito,
mentre c’a fora Luglio e Austo passavene.
A villa comunale era o rifugio nuosto.
Llà l’aneme noste ‘nnammurate se sciuglievene
‘ntra luonghe e tennere abbracci.
Nun cammenaveme pe terra: steveme ‘ncielo,
‘ncopp’e nuvole. Tutt’era assente.
…E quanno po’ int’a chella stanzulella,
ch’’a visto tutt’a felicità nosta,
tu te mettiv’a cazetta,
doppo c’aviva cummigliat’e laste d’a fenesta
cu na camicetta ancora ‘mprignat’’e addore tuojo,
je ‘e essa ero geluso
pecchè t’arravugliava, te strigneva
a coscia carnosa e janca ,
e  je sulo a guardà, sulo a sperirme,
ancora a te desiderà.
Stella! Stella Diana! Suonne e tutt’e suonne,
tu m’aubberive, e je t’ero schiavo,
tu cumannave e je te serveve,
je te chiammave e tu me rispunnive…
“Miettem’o ricchino, chiudem’a cerniera,
aiazem’e capille, mantieneme a spicchiera.”
Je pronto a farlo, ma cu delicatezza,
sfiurannete cu n’accorta liggerezza.
Tu te facive sempe cchiù ‘ncantevole
e je steve sempe a ‘llemosinà
nu vaso, nu sorriso, na carezza
ca tu me dive, sempe cu cchiù difficoltà.
Ogni juorne era peggio!
Si sulo t’accarezzavo e bracce, e mane, e trezze,
subito t’e tirave, lassanneme llà smuorto.
Tutt’a felicità ‘e chilli juorne ‘e fuoco,
comm’a neve che se squaglia o sole,
s’è scioveta  all’intrasatto, comm’a nu fatto d’uso.
E tutte e fazzulette ch’’ann’asciuttat’ammore
so addevennate pezze, adatte a luvà a povere…
…Sulo pe l’aria je sente ancora stì suspire
ca lieve sempe menano st’anema
‘Nparaviso.

Creato da Francesco Moschettino
Ultima Modifica 10 Aprile 2019
Torna ai contenuti